iPhone 4炒價回穩　都蝕＄ 88

原價$4,988嘅 16GB版本 iPhone 4，近日炒賣價一度跌至$4,700，搞到全港遍地蟹民。經過幾日「人踩人」式拋售，噚日水貨價開始喘定，企穩$4,900。八方向先達水貨商 Lo哥收風，佢話噚日仍有大批蟹民到先達放機，但氣氛已經冇早兩日咁恐慌，只係人人臉如土色，心情灰過灰塵。
「好多客都話第一次炒，點知就輸錢。」 Lo哥形容呢啲新手炒家，就好似股市啲羊生羊太，人炒佢又炒，遇到大跌市，俾人嚇兩嚇就即刻腳軟放貨，結果成為大戶點心。 Lo哥話今次咁多人損手，加上現價每部機要蝕一百幾十，相信短期內都冇人會向蘋果訂貨，調轉頭諗，即係貨源會慢慢減少，根據市場供求定律， Lo哥大膽預測遲啲炒價有可能重上$5,000蚊。博唔博得過？自己諗清楚啦。