Apple淆底喇!Apple將提供電池折扣

數碼情報站 於 29/12/2017 發表 收藏文章
之前《[用心良苦] 用Whatsapp都lag?為你好咋!》就講到Apple公開承認,因為為免電池老化影響部機嘅使用時間,避免大家用用下會突然熄機,官方專登限制咗你部iPhone嘅性能。即係咁做咗咪算,都已經係公開嘅秘密,本來舊電就無得自己換,喺官方換就要成六百幾,都擺明係迫人換機架啦,邊有理由衝出認咁低能架,而家咪出事囉!


Apple噚晚就發公開信道歉,道歉得嚟其實都係想話你哋唔識嘢,係大家誤解咗佢,咁做係大家好嘅。當然,串完你都要做返啲嘢表示返"歉意"嘅,由下年一月底開始為iPhone 6以後嘅機種推出換電嘅優惠,減到US$29,即係大概$226,平過你去先×、鴨×街搵啲科學家換,呢個優惠做到下年12月,幾有良心呀!唔止換電優惠,同場加映將會出個apps俾你check住你舊電嘅情況。


Apple突然之間咁有良心,係咪嚇親呢?唔使驚訝,因為佢淆底咋。淆咩?咪就係佢衝出嚟×之後直到今日,已經有9單指控Apple欺詐嘅集體訴訟,其中有單嘅要求賠償金額直程高過Apple嘅市值,俾你淆唔淆?雖則啲訴訟就未必會判Apple賠咁多錢,但個個都賠少少都夠和味啦,所以咪要做返啲嘢囉。認真講,細佬我就理解為咗避免耗電過多而限咗CPU嘅峰值係有用,就當Apple唔係想迫大家換機,咁都唔一定強制限咗佢嘅,俾個option我哋揀限定唔限咪得囉!


Apple道歉信全文:https://www.apple.com/iphone-battery-and-performance/

留言


請按此登錄後留言。未成為會員? 立即註冊
    快捷鍵:←
    快捷鍵:→