掃桿埔電單車路試《東院線》

銅鑼灣掃桿埔(大球場)絕對係電單車考生最常考嘅試場,原因多數都只有一個:排期快。港島考場一般都會比九龍快2-4個月,以2018年7月開始排期為例,就快足足4個月。呢個試場包括兩條路線:東院線、樂活線。兩條路線都各有特點,東院線上晝清閒,但喺下晝食飯、放學時間人多車多,後者相對通爽,就有條大斜路,部分屬禁學路段。打八字就唔講住,今日就首先為大家介紹東院線!

(一)出試場,入東院道
試場打完八字落斜路,路口查看左右交通情況,安全情況下右轉再右轉,轉入東院道。連續轉兩個右彎,要小心啲轉彎行車路線,避免俾考官捉「轉彎位置不正確」。如果交通情況順暢就記得選擇適當波段行駛,亦要留意路口有無車。
(二)棉花路讓路口
危險!連續兩個讓路口,地下兩個黃格、安全島,請預留足夠時間同距離俾自己做反應。過咗醫院停車場入口,沿路駛入銅鑼灣道後,會見到呢條街第一支紅綠燈。呢支燈非常過癮,行幾架車就會轉燈,記得俾足耐性。
(三)聖保祿醫院
過完紅綠燈直行,左邊長期泊有人泊車,越過障礙物要有足夠距離、動作要做足;右邊對面線有巴士上落客,特別多人亂過馬路,從對面線車罅間突然出現,打醒十二分精神,不宜開太快,咁就嚟到銅鑼灣道第二支紅綠燈,準備轉左入禮頓道。轉入去之前記得留意右手邊路口有無車先好入去,安全第一!
(四)轉入禮頓道
視乎時間,如果係放學時間會比較多家長、菲傭接放學,視線要一眼關七。選線要靈活,安全而且前面暢通嘅情況下應盡快返回左線,同時要留意右方印尼領事館路口、左方希雲街路口有無車駛出。過埋希雲街你會嚟到丹麥餅店,亦係禮頓道第一支紅綠燈。
(五)禮頓道巴士站
丹麥餅店紅綠燈前面有黃格,切忌跟車太貼,之後黃格前行一段就有個巴士站。突擊測驗:究竟巴士站可唔可以停車?如果你仲未識答,記得睇睇呢度喇。過埋巴士站打左燈,迎接禮頓道第二支紅綠燈,準備左轉入連道。
(六)轉入連道
轉入加路連山道後繼續打左燈,準備再左轉入加路連山道,留意連道(對頭車)有無車同你爭住轉彎,一般情況下,你應行使道路嘅優先使用權。
(七)加路連山道(南華會段)
就返試場,唔少考生都掉以輕心!左邊有時會停泊私家車、貨車上落貨、的士上落客。呢個時候應該更加預早留意前面情況,判斷前面係「死車」定係隨時會移動嘅車。由於道路唔闊,應該特別留意左右距離,尤其係越過障礙物嘅時候。眼望遠方,多加留意後鏡,做足動作,及早反應,有咩都難唔到你嘅!
(八)返試場
過埋南華會幾乎都返到試場,打右燈右轉入東院道,再右轉入試場。一般左邊線都會有學車(Van或電單車都計)排隊練車,左邊奧運大樓亦有機會有車出入,記得要做足越過障礙物動作。行到黑線附近停車,師傅指示嘅位置、或考官事前指示嘅位置停低。

停車,落左腳,擰頭望左右、熄匙、落右腳、落側架、從車嘅左邊落車。

(九)落車
嫌我長氣都要講多次,唔好呢步先做錯呀!記得慢慢來,無人會催你嘅!最後教你一個停車小秘訣:「由頭做到腳」。係咩意思呢?下次跟住呢個次序做啦:

頭:左右望查看交通情況

右手:右手熄匙後,繼續緊握頭制動

左手:鬆開離合器

右腳:繼續坐車,右腳而家先好落地

左腳:收起側架,最後車身左邊落車

總結
成個電單車考試咁就完成喇,入去等成績啦!東院試路短,但下晝人車較多。上課時需要重點訓練對交通情況嘅敏銳度同即時反應,就算有你未見過嘅突發情況,你都可以靈活應變,咁就幾點考都無有怕!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→