掃桿埔電單車路試《樂活線》

上次就講解過銅鑼灣掃桿埔嘅東院線,今日就講講另一條樂活線喇!樂活線雖然有條斜路,但係一般都比起東院線通爽。想應考樂活線萬無一失,就要學識「緩衝區」嘅概念喇。未聽過「緩衝區」?繼續睇落去,等輝Sir帶你遊返個圈,醒你兩招啦!
(一)出試場,入加路連山道
試場打完八字落斜路,路口查看左右交通情況,安全情況下左轉,左轉入加路連山道。如果交通情況順暢就記得選擇適當波段行駛,亦要留意停車場有無車出入。對面線有時會停泊私家車、貨車上落貨、的士上落客,甚至會使用你嘅行車線,記得判斷有無足夠空隙繼續行駛。沿路駛到連道讓路口。
(二)連道讓路口
去到呢個路口記得停車!因為左方既大廈阻擋左你嘅視線,加上兩條線嘅交通情況都非常繁忙,等到交通情況許可,就可以右轉。輝Sir有幾個貼士俾大家:

(1)不妨停得比較貼近白色虛線,咁先比較容易睇到從上而下嘅交通情況。

(2)避免扭右胎同急速剎車。路面左高右低,停車扭右胎的話,架車向右傾,增加落右腳風險。另外路面不平,急速剎車亦更容易失平衡。

(3)最好等到你同考官可以一齊過到個讓路口,唔好見有位就出,盡量預返你出到考官都出到就穩陣得多。你出到路口係一回事,安全出到路口又係另外一回事。
(三)加路連山道(保良局段)
小心留意路面線路同黃格,黃格所在亦係保良局停車場出入口,宜收慢車速,留意有無車。駛至樂活線既第一盞交通燈前就已經要預早留意前方讓路口有冇車,再左轉入禮頓道。
(四)禮頓道
繼續往前駛,你應該會去到第二盞交通燈。交通燈後禮頓里有路口需要留意,而且地面有黃格,宜與前車保持距離,等自己有足夠時間做反應。過咗禮頓里,去到第三盞交通燈,前面有一個比較長嘅黃格區域,同樣需要留意。
一直駛到皇冠假日酒店門口,會迎接第四盞交通燈,記得留意有無車進出,在黄格前預先選好來梗要行左右邊一條行車線,再過埋第五盞交通燈左轉入黃泥涌道。

(五)黃泥涌道
黃泥涌道左邊線常有私家車停泊,右邊則有電車行駛。電車軌比較滑,如果需要喺電車線行駛,應該保持喺兩條電車軌中間嘅瀝青路。

一直行到紀利華木球會旁嘅第六盞交通燈,之後將會抵達黃泥涌道巴士站。如果巴士停車嘅時候任何部份佔用你嘅行車線,你都需要做足過障礙物動作。過埋巴士站,你將會左轉上樂活道。

(六)轉入樂活道上斜
從黃泥涌道第七盞交通燈,左轉入樂活道上斜,樂活道頗為陡斜,建議以低波行車。上斜會經過兩個路口,第一個在左邊聖瑪加利大堂,第二個在右邊雲地利道,宜多加留意。上斜如果需要停車,宜提早轉回一波,以免手忙腳亂;斜路開車亦要俾多啲油,避免溜後,跟住一直上到頂會見到樂活線嘅第八盞交通燈。
(七)樂活道斜坡頂
喺上斜過完交通燈,前面斜坡頂就係黃格,加上斜坡令你視線受阻,究竟應該點樣處理呢?出面好多駕駛課程都忽略咗教大家「緩衝區」,趁呢個機會輝Sir同大家講解下啦。其實道路規劃嘅時候都考慮到斜坡帶來嘅盲點,所以喺交通燈同黃格中間設立咗呢段空隙,就係所謂嘅「緩衝區」。如果你睇唔到前面黃格有無足夠空間通過,你可以喺緩衝區入面觀察,同時亦要避免同前車距離太近,盡量令自己視線可以望到前面交通情況。

通過黃格之前,斜坡頂左邊亦有路口需要留意。
(八)連道(落斜)
過埋樂活道嘅斜坡頂,就繼續直行喺連道落斜,要加倍注意頭尾brake嘅互相配合。沿途會有第九盞交通燈(最後一盞喇),雖然轉紅燈嘅頻率唔高,但絕對唔應該太「老定」,應該留意交通情況(例如前面車輛嘅煞車燈),隨時有停車嘅準備。

去到減速牌付近可以打右燈,查看交通情況然後靠右。駛到路口,如果交通情況唔明朗,應該喺等候區停車等待,然後右轉入加路連山道。

(九)加路連山道(南華會段)
就返試場,唔少考生都掉以輕心!左邊有時會停泊私家車、貨車上落貨、的士上落客。呢個時候應該更加預早留意前面情況,判斷前面係「死車」定係隨時會移動嘅車。由於道路唔闊,應該特別留意左右距離,尤其係越過障礙物嘅時候。眼望遠方,多加留意後鏡,做足動作,及早反應,有咩都難唔到你嘅!
(八)返試場
過埋南華會幾乎都返到試場,打右燈右轉入東院道,再右轉入試場。一般左邊線都會有學車(Van或電單車都計)排隊練車,左邊奧運大樓亦有機會有車出入,記得要做足越過障礙物動作。行到黑線附近停車,師傅指示嘅位置、或考官事前指示嘅位置停低。

停車,落左腳,擰頭望左右、熄匙、落右腳、落側架、從車嘅左邊落車。
(九)落車
嫌我長氣都要講多次,唔好呢步先做錯呀!記得慢慢來,無人會催你嘅!最後教你一個停車小秘訣:「由頭做到腳」。係咩意思呢?下次跟住呢個次序做啦:

頭:左右望查看交通情況

右手:右手熄匙後,繼續緊握頭制動

左手:鬆開離合器

右腳:繼續坐車,右腳而家先好落地

左腳:踢返側架落地

最後車身左邊落車,完成成個考試

總結
唔少同學都好怕第(二)點提及嘅讓路口,同埋(六)嘅大斜路。要應付(二)嘅讓路口,應該多加練習,熟悉視覺盲點、交通情況,就算車多等得耐都無須緊張。至於(六),就應該練好斜路開車停車功夫。唔少同學能力上其實可以輕鬆駕馭樂活線,只係心理上未準備好而已。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→