電單車斜路打8字技巧

考電單車牌嘅流程相信大家都清楚架喇，「斜路8字」可謂路試唔可以睇小嘅部分，今次就同大家簡單講下啦。其實打8字唔係想象中咁難，雖然最快有人一兩堂就搞掂，不過普羅大眾學多幾堂都好正常嘅。想考試成功打到8字，技術要扎實之餘，心理質素都非常緊要。

「斜路8字」有咩用？
「斜路8字」訓練就係想各位電單車駕駛者喺狹窄嘅空間可以流暢咁調頭。「斜路8字」係電單車考試裡面嘅重點之一，打唔到8字就即刻唔合格。
（真心話：又咁講，考完試個個都唔會用「打8字」嚟做斜路調頭 ）
打8字程序
首先你要從起步位置往前駛，然後o係1號位停低，完成斜路開車停車，8字先會正式開始。
1. 1號位預備，打右燈（打8字時長開右燈），擰頭查看交通情況，開車往2號位

2. 到2號位轉右彎，駕駛到3號位，轉右往1號位

3.到1號位左轉，到彎放少少Break，保持電單車有足夠動力

4. 到4號位，左轉，返回2號位

一般會打3-8個8字圈，然後等考官示意就可以停低喺5號位。恭喜你，呢個時候考官就會同你講行邊條路線，然後你就可以出街行路試喇。

基本技巧
1.車速控制

「定油門」係最常見嘅速度控制方法。將油門定住，適當嘅時候靠尾Break拖慢架車。如果油門又唔定，Break又控制得唔好，架車就會Chok下Chok下，好容易落腳，尤其係考試特別緊張嘅時候。不過如果你學極都唔慣，「定油門」又唔係唯一嘅方法嚟嘅！
2.視線控制

識得控制視線，打8字就事半功倍。電單車有樣好得意嘅特性，當你視線望向某個點，架車就自然會跟住去嗰個點。每次轉完彎都要盡快搵返個目標望住，架車就唔會飄嚟飄去。

3.身體傾側

轉彎時，身體應該反方向傾側。電單車左轉，人就應該右傾，咁先抵銷到，唔會失去平衡，反之亦然。

4.夾住油缸

呢個技巧就只係適用棍波車嘅同學。用力夾緊油缸，避免雙腳「條條Fing」，大大增加慢車駕駛嘅穩定性。
最難係邊個位？
實際上都係因人而異，最常見嘅係下面轉返上黎嘅彎，架車動力不足，加上夾唔緊油缸，自然特別容易落腳。

速度控制都係另外一個難位，扭得快當然都可以打到，不過如果某個動作做得唔好想修正就未必夠時間喇，而且往往令考官覺得你「心急、唔安全」。而車速太慢的話，一轉彎就好容易失平衡跌腳，一樣係唔得。
更多進階貼士
打8字做法五花八門，最緊要搵到適合自己嘅方法，甚至連「定油門」都唔一定係金科玉律。要成功打8字，除咗有合適嘅方法，就係不斷練習。將正確嘅動作做一百幾十次，等身體嘅肌肉習慣，記得每個轉向位置，咁就考試都萬無一失啦！更多進階技巧，請聯絡輝sir。