二手電單車 購買流程小秘笈

第一次買電單車,又唔識睇車、又牌簿又牌費又保險,係咪好頭痕呢?今日等輝Sir教識你買人生第一架二手電單車啦!

先睇車揀款
你可以根據用途、外觀、經濟原因等等考慮車款,如果你未肯定自己想要自動波定棍波,或者呢篇文 會幫到你。當你揀啱之後可以去比較熱門睇車嘅網站,例如有28car.com或者Facebook群組Motorbike for sell等等。當然你都可以去各大二手車行,不過今日就集中講私人買賣先啦!

約賣家睇車
正所謂見微知著,睇車不外乎係從外觀嘅蛛絲馬跡,睇下有無曾經撞過跌過、漏油滲油等等,從而判斷係咪一架狀態良好嘅車。當然就咁肉眼睇、聽聲判斷好有限,最好都係搵個專業人士幫手睇啦!

(1)如果有心買車,盡量唔好未睇就講價!你想買心頭好,車主同樣都係割愛賣緊心頭好。

(2)盡量喺日間有陽光嘅時間睇車,可以睇清楚暗位同顏色等等。

(3)最好拎塊鏡去,睇真引擎附近同車底及暗位嘅位置, 如果有好多油漬就要加倍小心,或者有機會係引擎漏油,可大可小。漏油問題同樣可以透過檢查避震、油管等等而觀察到。

(4)如果係睇水冷嘅電單車, 留意水箱蓋有無裂、水喉、膠塞有無老化等等。

(5)車嘅接駁位、鵝頸有無裂痕,又或者有無奇怪位置有從新焊接過嘅痕跡。

(6)觀察架車有無曾經嚴重跌過或者『派車』。你可以檢查突出嘅部件,因為如果跌過,突出嘅部件(例如腳踏、牛角、把手)會最先落地,所以會刮花或者彎曲。最嚴重嘅係車架同把手都跌彎,連平衡都有難度!

預備文件
如果架車無問題、價錢都傾掂,就係時候準備買賣合約喇!你可以喺網上下載車輛買賣合約範本 , 雙方簽齊文件同落訂金後 ,就再同買家相約日期畀錢交收同做轉名手續。轉名手續費用係$250,雖然一般慣例都係由買家俾,不過都記得盡早確認一下。

好多初哥第一次都會搞亂「車輛登記文件」同「行車證」,喺講程序之前都解釋下兩者分別啦。

「車輛登記文件」即係所謂牌簿,就好似車嘅出世紙,記錄咗車嘅基本資料(出產、落地年份、容積、型號、顏色等等),同時都會有現任車主嘅資料。所謂「轉名」,即係更改車輛登記文件,證明你擁有架車。記得檢查車身編號、引擎編號同牌簿上嘅編號係咪一致。

「行車證」就好似身份證咁,要清楚展示喺車左面,要定期俾錢、續領先可以喺路上行走,俗稱「買牌費」。

保險問題
在到運輸處進行轉名手續前,必須先自行到保險代理購買保險,成功投保後你會得到一份叫Cover note嘅保單(官方名稱:第三者風險保險單)副本,一般一至兩小時可以做好。輝Sir亦可以搵人幫你出到車保,詳情請聯絡我。

轉名手續
你要拎齊以下文件去運輸處辦理「轉名」手續(官方名稱:車輛過戶):

(1)TD25表格,表格一式兩份,記得簽齊名。舊車主表格上嘅簽署,必須同牌簿舊車主簽名相符。

(2)舊車主牌薄正本(車輛登記文件)

(3)新車主身份證正本

(4)新車主駕駛執照正本

(5)新車主有效住址證明(三個月內)正本副本皆可

(6)以新車主名義購備的第三者風險保險單或臨時保單(cover note)副本

(7)$250(電單車及機動三輪車的過戶費用,2019年頭價錢)。如果唔想再排多次隊交錢,可以用EPS,咁就可以喺交表嘅時候俾埋錢。

行車證
另要留意行車証(官方名稱:車輛牌照)過期未,如果上手牌費未過期,你可以略過呢部份;如果過期就要俾「牌費」,續領行車証,表格可以搵返最新嘅「續領車輛牌照申請書」(TD 558):

有幾點值得留意:

(1)如被法庭命令繳交罰款,須先付清罰款,才可申請續牌。

(2)須要驗車的車輛,必須在遞交申請前完成驗車。

(3)如行車證屆滿2年或以上,車輛會被取消登記。車主要重新辦理登記手續,才可申請行車證。

(4)你可以選擇購買4個月或者1年。

(5)行車證必須顯示在車輛左方當眼處

少少建議:
第一次睇車唔好扮專家。唔識睇好正常,最好搵埋識睇車嘅朋友一齊去。

熟唔熟都好,一切文件、錢銀最好清清楚楚,交易順暢之餘留個好印象,分分鐘變老友。

避免有咩遺留、錯誤(例如有牛肉乾轉唔到名、舊車主表格簽名同牌簿簽名唔同),最好新舊車主一齊去運輸署當面搞,過完數、轉完名當面交收埋架車,咁就保障到大家。

如果想最安心,當然係搵專業人士,例如車房朋友幫手睇睇啦!



學電單車專業導師 輝Sir
Facebook專頁:https://www.facebook.com/faisirmotorbike/
📞6425 7823✅
Whatsapp https://goo.gl/3n5RXi
🌐 www.faisirmotorbike.com

留言


請按此登錄後留言。未成為會員? 立即註冊
    快捷鍵:←
    快捷鍵:→