雨天揸電單車並唔可怕【技巧篇】

好多同學問我「喂輝Sir，落雨揸電單車咪好危險？」其實真正危險嘅唔係雨天揸車，而係你唔識雨天揸車。住得喺香港，就算晴天開車，都難免會揸到半路遇到天雨。其實只要你學識落雨揸就輕鬆得多，今日就先從技巧同心態講起！

（【裝備篇】請按此）

【技巧篇】：

落雨頭20分鐘會沖出路面表層油污，係最最最地滑嘅時候，揸車可免則免！不妨等多一陣，沖走表面油污之後，其實馬路只係一條有水嘅瀝青路，並唔可怕。乾燥路面轉彎有1-1.1g側向力（Lateral Force），濕嘅路面大概0.9g，其實並唔差得遠！多數令你出意外嘅都唔係水，而係油跡等等。
小心過彎！始終摩擦力係減少咗，留意轉彎輪胎傾側角度，保持同地面嘅接觸面。

就算係直路，不但你（電單車）需要更長剎車距離，其他車亦需要更多距離，切忌急剎。

落雨能見度減少，尤其係大雨或者落雨前後嘅霞氣、霧氣。特別要需要小心，打燈、望鏡、擰頭要做足，唔好假設其他駕駛者一定見到你。

【心態篇】

唔好過分自信，亦無需要驚落雨。

可能你揸咗好多年，可能你揸得好定好快，以為自己係車手，但落雨始終物理上會令駕駛嘅難度提升，好多嘢難以預料，切忌過分自信，拜託拜託要額外留神。
話雖如此，就算你係新手亦唔需要怕落雨。香港天氣多雨潮濕，總會遇到落雨天，只要做足準備，有適當嘅技巧同心態，其實落雨又有咩好怕！

不妨睇埋有咩裝備可以幫到你克服雨天啦！