電單車駕駛考試【筆試 初學 Q&A】

由零開始學電單車要經過三個考試：（1）筆試 （2）強制試 （3）路試，如果你成世人都未考過車，呢個筆試你就走唔甩喇。關於呢個筆試，唔少同學都有以下嘅問題，而家輝Sir就一次過解答啦！
問：筆試考乜？
答：筆試係由 《道路使用者守則》 出題，我拎住嗰本黃色書係舊版，2020新版係藍色嘅。入面好詳細講解揸車時注意事項，法例，規矩，道路標記等等。筆試入面有20條選擇題，每題都有三個選項，只要答啱16條，即係80% 就合格。

問：點樣溫筆試好？
答：本《道路使用者守則》 真係有啲太詳盡，又唔使成本背曬嘅。網上同app有好多模擬試題，一邊做，一邊記，會更加有效率！想穩陣啲，臨考就成本嘢快睇一下啦，畢竟有時都會問啲好冷門嘅題目。

問：考筆試要帶啲乜？
答：同菠蘿包無菠蘿一樣，筆試係唔使帶筆嘅！只要帶身份証同排期信，用電腦答題。
問：考過筆試，係咪唔洗再考？有無得收平啲學費？
答：筆試合格嘅成績一生有效，合格就唔使再考！ 筆試嘅收費就係政府收嘅路票（路試費用），即係「筆試費」+「強制試」+「路試」係政府捆綁嘅收費，無得分開俾。就算你唔使再考筆試，呢個錢政府都要捆綁咁收，所以學費就無得平啦。

問：想考電單車，之前未考過筆試，我可以自己去運輸署報考筆試先嗎？
答：筆試一定要同電單車強制試一齊報，而私家車或輕型貨車就要同路試一齊報名，無得就咁報，最方便就係搵我報強制試時，一條龍幫你報埋筆試啦。

問：筆試合格之後點？
答：恭喜你！可以去上強制課程了，即係有得揸電單車喇！
問：筆試肥佬點算？
答：喂呀咁淺都肥佬！唔好話俾人知，俾$510運輸署買路票再排過期考過啦！ 打算學電單車嘅你，係咪有好多嘢想知呢？立即Click呢度留個名https://forms.gle/hSBKhTnthLJFz5Yo7 輝sir或者輝sir團隊會有專人聯絡你，免費解答你嘅疑問！

輝Sir電單車課程
Facebook：https://www.facebook.com/faisirmotorbike/
電話：64257823（或按此Whatsapp）