香港地圖玄機，真係好神奇！

話說，內地網民早前畫咗一幅漫畫化中國地圖。於是高登有高手（(糊手然塗）看畢手癮發作，用高登術語「蛙鵰鯉」為題，創作咗一幅漫畫化香港地圖，即時於高登討論區發表。



以下係「糊手然塗」的往後經歷：

發表唔够一個鐘，有高登巴打「丁榮通姦二叔」回帖，佢話喺「將軍澳」地圖上見到一個囡囡側面像，但奇就奇在個懷春囡囡有喉核，我心諗，唔係咁邪下話。於是打開「將軍澳」地圖一睇，蛙鵰鯉！原來唔係懷春囡囡，係一個「將軍」！咁梗係有喉核啦，我即時將呢個發現用好似扶乩通靈術一樣嘅手法畫出嚟，同巴打分享吓，下面就係將軍現形圖。

喺「將軍澳」地圖上揾到個「將軍」，呢件事好唔尋常，於是我打開Google Map，睇下我成長地--「牛頭角」，講你都唔信，「牛頭角」地圖上真係俾我見到個「牛頭」！我驚到講晒粗口，又畫咗出嚟。


乳齒同時，有高登巴打「黑哨@黑仔」發現馬鞍山有隻賴皮海獅擱淺於海皮，放咗張海獅現形圖出來。估唔到有咁多人同我一樣，識扶乩繪圖術，唔係咁猛下話。

（呢個唔係好明，同「馬鞍」好似無咩關係？）

於是我又不甘示弱，在「天后」地圖旁邊發現咗一個天后像，今次連天后娘娘都顯靈喇！

我又再發現被「馬頭」形狀包圍的「馬頭圍」地圖 !


荃灣的「象鼻山路」真係一條「象鼻」 !


原來香港地圖暗藏玄機。我望住「天水圍」地圖，晃然大悟，唔怪得之前咁多蝗蟲由大陸落來「天水圍」收購奶粉空罐造假奶粉啦，原來「天水圍」本身就係個大奶樽！個奶樽仲要漏緊奶出海！(雖然有好多男士望住下面張圖會認為嗰碌柱狀物體似第二樣嘢)

我更知道咗「龍翔道」點解叫「龍翔道」，因為「龍翔道」上面真係有個「農場」養緊羊，仲係隻大碼羊。

而且隔離「礸石山」真係呈現礸石型！關於鑽石山得名嘅原因，坊間有個古老解釋，話係因為中文名稱中嘅「鑽」字係個動詞，即係把岩石鑽開嘅意思，而鑽石山附近就曾經有一個石礦場，後來尐人誤會咗以為真係有鑽石。我呸！呢個解釋你都信，我就話真正嘅香港地名命名祕密，都喺一個網站--Google Map內，比起祕魯嘅「納斯卡線（Nazca Lines）」還要神奇。嗱，冇呃你㗎，唔信你自己上 Google Map 扶乩通靈吓，可能又有新發現。