瘋狂世界盃補習社（八），阿根廷拒絕做乖仔

早前阿根廷對克羅地亞場波，個個睇完都「DXXM，阿根廷真係好鬼茅！」、「吓吓都唔收腳咁滯，想收賣人命咩？」其實，只你睇波有返咁上下年資，對於阿根廷呢支國家隊的踢球風格，真係可以引用《少林足球》吳孟達替少林足球隊邀約一支業餘足球球試陣之初，坦言「你哋球隊嘅作風，喺業餘界係好出名」。出名咩？當然係出名踢法硬朗，好波之人會略帶粗魯；唔係咁好波的後衛就變了粗野了，喜愛在球場上撩事鬥非，其中以輸緊波嘅時候尤甚。但是，正所謂「男人不壞，女人不愛」的絕世理論，阿根廷偶爾出產的「壞孩子」儘管幾咁頑皮，但是在好波底之下過關斬將，是有助提升一場球賽的催化劑，1978及1986年兩奪世界盃，隊中就是靠兩位脾氣曳曳但好波到暈「笑到最後」──甘巴斯及馬勒當拿。
甘巴斯年代，計返有40年歷史，不提也罷。至於馬勒當拿脾氣有幾臭，「老波骨」必定領教過，1982年世界盃阿根廷未算是熱門，晉級次圈後跟巴西及意大利同組惡鬥，阿根廷最終出局也沒有可惜，偏偏對巴西一役他老羞成怒施展一記「穿心腿」，獲得一塊紅牌被趕離場，這是球王馬勒當拿初試世盃之旅的首站，叫世人驚見他的「壞」。4年後的墨西哥世界盃，他帶領阿根廷一路奇兵殺入決賽，展現球王級數，尤其8強面對擁有連尼加的英格蘭，一場由他策劃的「天使與魔鬼」之戰，一人連過6名英格蘭球員扣埋施路頓入網，天使嘅化身；伸出「上帝之手」將皮球撞入龍門（當年沒有VAR技術嘛，都幾多冤枉波），地獄嘅使者。又愛又恨，是阿根廷人給世人的感覺，90年世盃他載譽歸來，意大利人同樣對他有多番感慨，皆因他當年效力拿玻里，為球隊歷史性捧走意甲，好多意大利人都當佢神咁拜。然而，高峰期過後，94世盃復出後又禁藥又停賽又私生仔一籮籮又剩，形象大插水下他依然是國民英雄，至今不衰。
馬勒當拿過後，你還數得出哪個有返咁上下份量的壞孩子？「風之子」肯尼基亞？巴迪斯圖達？（其實佢一啲都唔壞，當年隨費倫天拿降班已顯出其有情有義）柯迪加？艾耶拉？列基美？馬斯查蘭奴？施蒙尼（記得他扮嘢累及碧咸出場嗎？）。所以話，美斯太乖了，或者曳少少，可能其世盃成就會不一樣呢？


你可能還對以下內容感興趣
想買都未必買到 不能錯過的4大人氣波鞋
瘋狂世界盃補習社（七） 擺烏龍隨時命仔不保
瘋狂世界盃補習社（六） 荷蘭先係絕種二奶命
NBA終於選完秀 三大輸家係邊位？

資料來源：men's uno (http://hk.mensuno.asia/node/%E7%98%8B%E7%8B%82%E4%B8%96%E7%95%8C%E7%9B%83%E8%A3%9C%E7%BF%92%E7%A4%BE%EF%BC%88%E5%85%AB%EF%BC%89-9887)
本文由《men's uno》授權報導，未經同意禁止轉載。