瘋狂世界盃補習社（十一）— 美洲龍，愛演嘢

德國今屆恥辱性分組賽出局，雖然「死者已矣」，但賽後「包膠」要討論的話題也不少。例如議論一下班泡菜仔用不完的氣力外，德國門將紐亞「棄關出迎」跑到去前半場，嘗試以一人之力為球隊扳平，最後反導致失波被對手玩反擊入多球的舉動，已經夠哂充滿喜感。其實，有睇開德甲都知道紐亞本尊本身就唔多鍾意安份守份做好個龍門職責，跑出禁區外玩波更屬司空見慣。不過，講到做龍做到當自己係前鋒咁衝出禁區滿場飛，點都唔夠班美洲龍咁好身手吧。
「狂人」希基達，聽到個名都驚啦！你或者聽過佢個名，但卻未必知道佢來自邊個國家？無錯，又係好鬼恐佈嘅哥倫比亞，時為1990意大利世界盃，呢位哥倫比亞鋼門喺分組賽做咗一件爆seed嘅經典場面。面對喀麥隆前鋒米拿，佢在毫無危機下竟然喺佢老人家面前獻技扭波，結果係「薑是老的辣」，米拿偷走希基達的腳下球，就咁就入多粒，為喀麥隆當屆歷史性為非洲國家首次晉身世界盃決賽周次圈打下強心針，而哥倫比亞的下場就是──出局 (好彩佢返到家鄉無俾人槍殺咋)。更值得一提的是，今屆世界盃我哋竟然喺現場見到佢老人家，仲同當年隊友「金毛師王」華達拉馬坐埋一齊睇波波，無論身型、髮型同埋樣貌都絲毫無變啊。

90世界盃過後，94世界盃嘅墨西哥又出咗個綽號「花蝴蝶」嘅龍門──甘波斯。呢位仁兄做過前鋒，所以本身腳底功夫好，又識入波。更惹笑的是，佢每次出場總會身穿花喱碌的彩身戰衣，據講咁樣著可以影響對方射門時的反應？結果真係掂，94世界盃佢真係帶領墨西哥晉身16強，最後只係輸俾保加利亞而已，算無犯下彌天大罪之下都仲叫有交代。至於再4年後就輪到巴拉圭個龍門發威──芝拉華特，呢條友仔真係癲㗎！癲㗎！74次代表國家隊守龍，居然可以入到8球，全部都是來自12碼和罰球，產量之高你都咪話唔驚嚇。由佢帶領下的巴拉圭更在98及02兩屆世界盃殺入16強，堪稱一時佳話。不過自此以後卻鮮見「愛演嘢」嘅美洲龍了，近年人稱「Sam哥」的墨西哥守門員奧祖亞都只係靠髮型上位啫，又乜咁稀奇？你睇返當年希基達個90年代至有型嘅長髮鬈毛頭就知邊個贏啦。

你可能還對以下內容感興趣
四屆元老贏盡一切 恩尼斯達生涯回顧
未開波先養眼 精選西俄至索女眷
年少成名 昔日神童 朗尼職業生涯回顧
LOUIS VUITTON LES PARFUMS MASCULINS 看不見的男性誘惑

資料來源：men's uno (http://hk.mensuno.asia/node/%E7%98%8B%E7%8B%82%E4%B8%96%E7%95%8C%E7%9B%83%E8%A3%9C%E7%BF%92%E7%A4%BE%EF%BC%88%E5%8D%81%E4%B8%80%EF%BC%89-9900)
本文由《men's uno》授權報導，未經同意禁止轉載。