瘋狂世界盃補習社（二十）— 有一隻烏鴉叫「比利」

世界盃今晚過後就曲終人散，作為最後一篇嘅「瘋狂世界盃補習社」，梗係要寫返篇「型到跌渣」嘅專題告別大家。諗咗好耐，終於俾我諗到，就係講比利啦！

無計，小弟才疏，真係無哂貨咁濟。不過，比利咁鬼出名，問你阿媽都知佢有幾威水啦。助巴西三奪雷米金盃呀嘛！最年輕世界盃球員呀嘛！咁唔講佢未退役之前嘅事跡啦，「球王」退休後好快就轉咗行，改去做鳥獸類，無錯呀佢去咗做咗隻「烏鴉」，1974年開始先有嘅巴西新品種。

點解比利會被叫作「烏鴉」？因為佢有一把好燈嘅烏鴉口，「開口中」的或然率係高達99.99%，同9999金一樣貨真價實。但凡比利開金口貼邊個邊隊會掂，絕大機會最後都事與願違。不特止，被點選嗰隊仲會死得好慘！經典例子一籮籮，94年世界盃佢預測哥倫比亞會入四強（無它嘅，嗰屆外圍賽哥隊係踢得出色），結果分組賽連輸兩場，仲間接「燈死」埋擺烏龍嘅後衛艾斯高巴。慘慘慘，搞到死人都仲未知衰，98世界盃繼續努力扮演「烏鴉」角色，誓捧西班牙，結果分組賽第一場已落筆打三更反敗給尼日利亞，打完三場返屋企；02世界盃更向高難度挑戰，竟敢向該屆首次打入決賽周的「贏国」宣戰，話偉大的中國隊至少能打入16強，但最後結果係成為「四零部隊」，即係打咗三場分組賽錄得0勝0和0分0入球，捧蛋呀陰公。
 「烏鴉」的故事仲有好多，例如2010世界盃佢睇好有非洲球隊殺入決賽，又燈中；今屆賽前睇好巴西及尼馬，最後只能於8強行人止步。因此，巴西國內媒體普遍對比利的「賽前預測」退避三舍，皆因臭名晨早遠播，94世盃奪標功臣羅馬里奧就曾經公開表示：「只要比利肯閉上自己的臭嘴，他已經是一位詩人。」此外，巴西著名教頭史高拿利更加直言：「比利對足球一竅不通，他的分析通常都會證明是錯誤的，如果你想拿冠軍，那你就聽聽比利的建議，然後做與他的建議相反的事。」好hurt呀！不過，買10鋪大細總有一鋪中嘅，去屆世界盃佢本尊賽前真係貼中咗德國捧盃呀，好叻豬。期待比利下屆世界盃可以好似大軍咁繼續發功，鋪鋪中，一於將老豆變成鬼佬啦。
你可能還對以下內容感興趣
瘋狂世界盃補習社（十九） 後生仔 是咪未夠爐火純青？
求愛不遂唔洗亂諗 4條橋助你擺脫尷尬
瘋狂世界盃補習社（十八） 總有出頭天 那些年的北歐波
FIFA大使暨俄羅斯小姐 Victoria Lopyreva叫你睇波

資料來源：men's uno (http://hk.mensuno.asia/node/%E7%98%8B%E7%8B%82%E4%B8%96%E7%95%8C%E7%9B%83%E8%A3%9C%E7%BF%92%E7%A4%BE%EF%BC%88%E4%BA%8C%E5%8D%81%EF%BC%89-9983)
本文由《men's uno》授權報導，未經同意禁止轉載。