解讀HKTV收購流動電視牌照

香港科技日常 於 28/12/2013 發表 收藏文章
王維基嘅香港電視網絡(HKTV)喺上星期五收購咗中國移動香港其下嘅網絡電視子公司之後,有唔少人都討論佢會用邊個流動廣播制式嚟開台,事關通訊局冇限制要用邊一種制式,而中移動嘅流動電視平台UTV用緊嘅CMMB制式支援嘅影片解像度亦都非常低。流動電視牌照亦都唔受《廣播條例》規管,所以比起ATV、TVB編排節目更具自由度。

簡單啲講如果王生決定同而家TVB、ATV用同一種制式,甚至變相變成第三間商營免費電視台!但係通訊局又會唔會畀HKTV咁樣做?筆者睇過唔同網友、專業人士嘅意見,以及基於自己一直以嚟所知嘅資料,寫咗呢篇嘢,分析下(1) 收購流動電視牌照嘅目的、(2) HKTV用咩制式好、(3) 點解要繼續爭免費電視牌照。

流動電視同普通手機上網睇片有咩分別?點解要收購個牌?
平時手機上網睇片係要透過行動數據或者互聯網,而流動電視講嘅係直接由裝置接收電視訊號,唔使透過互聯網,就好持手揸一部電視機咁,唔會窒。

HKTV收購流動電視牌照嘅目的,好大可能係希望而家睇到數碼廣播嘅電視機都可以喺近乎唔使改動裝置嘅情況下都可以接收到佢哋嘅頻道!睇埋下面講制式嘅部分應該會清楚啲。

筆者認為由始至終HKTV都唔係想主打流動電視,所以佢哋都買咗個牌之後都提過OTT(Over-the-top)、4K拍攝等。


用邊種制式?

王維基喺12月23號已向傳媒表示,用2000至3000萬進行改善流動電視畫質,即係好大可能會轉用其他制式。咁佢會轉用邊種制式?由收購公佈嗰日開始已經有唔同嘅討論,喺度先總結一下坊間各種說法:

1) DVB-T2 / DVB-T2 Lite

DVB-T2 / DVB-T2 Lite 制式支援嘅頻寬可高達約50 Mbits,比起而家香港普通數碼電視廣播用嘅DMB-T/H支援嘅約20 Mbits要高。呢個制式嘅好處就係高嘅頻寬可以播更多嘅台,或者用4K(高清1080i/p像素嘅4倍)廣播。壞處就係而家支援嘅設備唔多,香港而家市面上嘅電視機都唔支援。

筆者認為HKTV唔會用市面未普及嘅制式嚟廣播,因為HKTV都要靠廣告收入維生,所以佢最需要嘅係普及率。而且現有設備未必夠機能去解碼4K嘅影片,即使要高清廣播,其他普及率高嘅制式都可以做到。

2) DTMB (DMB-T/H) 或 E-DTMB

DTMB,又叫做DMB-T/H,就係香港而家TVB同ATV用嘅數碼廣播制式。「DMB-T/H」入面嗰個H係代表Handheld,即係個制式可以用嚟做手機廣播。而E-DTMB係DTMB嘅其中一個後繼版本,更加適合流動廣播,最緊要係可以做到而家睇到TVB同ATV高清嘅電視機,只要收到流動廣播訊號都可以睇到!

當然,比起上面嘅DMB-T2 / DMB-T2 Lite係冇咁多頻寬,但HKTV開台初期其實只有兩個頻道,而且最緊要係制式已經喺香港普及。

3) 其他制式,或者維持CMMB
流動電視重有其他制式,例如南韓嘅T-DMB,日本嘅ISDB-T等,但係基本上都比起上面兩隻制式都冇優勢,甚至從經濟效益嘅角度出發,可能保留CMMB制式重好。

由於王維基已經確定會揼錢改善廣播質素,所以基本上只有1同2係有可能。當然王生一向都被外界話「不按牌理出牌」,可能會有更加出人意表嘅決定都唔定。

講到流動電視牌照咁好,點解要繼續爭免費電視牌照?
流動電視訊號雖然有機會直入屋企嘅電視機,但係流動電視牌照只有一條8 MHz寬嘅特高頻頻譜,畫質同頻道數目都有限,呢個情況就要靠之前講嘅租用香港寬頻嘅網絡嚟廣播。但係只要一用呢種模式廣播,就一定要有免費電視牌照先得,因為咁樣係用流動電視頻譜以外,非大氣電波方式嚟廣播,已經完全唔係流動電視。而OTT平台係屬於串流型式,係唔需要拎牌。

(筆者第一次寫文,如果有咩意見或者錯誤嘅地方歡迎提出同指正)

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→