老老實實，打波可唔可以唔帶條女黎？ 精選

呢句說話，今日我代表圍內波友，向我朋友Lucian講。


「點解？打完波一齊食餐飯嘛！咁佢夜晚又無野做，咪叫佢黎睇囉。」佢嘅回覆。

因為帶條女黎睇自己打波嘅男仔，九成以上都保持唔到平常心。就我睇起上黎，多數得兩個結果：一係變得獨食，一係變得非常獨食。



我仔細研究過呢樣野，可能因為籃球場太細，觀眾好易睇晒場上每個人嘅動靜，身為球員，表演欲係會旺盛啲。同時，我唔知點解女性對插花同三分球係特別敏感，當我聽到女仔講左句「點解唔望都知個波喺邊嘅！」同埋「穿針嘅聲好好聽。」我就知道出事。
傳左個波比Lucian，一定唔會返得到我手。球球單打，依家三打三，另外兩個隊友包括我，就變左專門幫你防守同拎籃板。講真咁多年兄弟，你要威要型，單打唔緊要！

但係你都唔好係咁插花丫……
插花都唔緊要，唔好插完花即刻射三分丫……
射三分都唔緊要，唔好原地舞一輪Step back先射丫……
我本住大家都有睇NBA，你崇拜Stephen Curry同James Harden，唔緊要！你前幾年重係湖人fans，我唔話你Glory Hunter！但係呢度係街場呀大佬，原地舞一輪Step back + Fadeaway三分呀……
人唔笑狗都吠啦，係咪？

「有球入呀！」Lucian抗議。

八球入一球，進攻獨食都算。條女喺度，防守又怕比人見到博命嘅一面──搶板唔揹位，五五波一定唔追，無波喺手就懶懶閒，我唔數落去啦，你記唔記得自己細個陸運會一百米12秒頭就跑完先！長跑你都有拎獎架！你係跑狗黎架！今日呢個表現！你對唔對得住自己呀！



「你地又入唔到分，無計架喎……」呢句通常係所有獨食嘅人嘅金句。
「打波其實玩下姐。」免責聲明。
「輸左又搵人賴，場場贏你唔洗打街場啦。」呢句我真係唔知點形容。
其實Lucian反駁左一大輪，但呢三句大概就係佢要表達嘅意思，我真係激到就快昏迷，呢個時候，岩岩場波第三個球員Kevin走過黎同我地講：「唉，唔好嘈啦，打場波姐。不過，Lucian，你岩岩真係好似Kobe。」

Lucian以為有人幫，正想講野，Kevin接住講：「2016年嗰個Kobe。」

全部人笑到痴線，然後有人終於應承下次唔帶條女出黎，不過都係聽住先啦。