追女仔系列: 如果你覺得追女仔好難,可能係你未識溝通

WHATEVERFA 於 03/02/2017 發表 收藏文章
執正行頭之後,你要推銷自己。
你作為小毒男一號,五官平庸,身高五呎九,無一份講出黎就威懾全場嘅好工,就好似product本身唔係真係咁吸引嘅時候,你可以用另一個打法。
表達你係最適合佢嘅人。而表達本身,都係有個信條要守:隱惡揚善。我比個例子你,記唔記得有首歌「我很醜~可是我很溫柔~」(其實就係歌名)。歌入面除左很溫柔,重有好多個優點,你記得幾多個?
你一係完全數唔到,一係話條友重有音樂和啤酒,而你記得嘅原因,係因為都Chorus直接放喺我很醜後面。最重要嘅係,「我很醜」可被接納,因為呢個係內心嘅投射,自慰當然會包容。如果換轉一把女聲唱「你很醜~~」嗰種高亢激昂既腔調,我包保聽完淨係覺得「條友真係好醜喎,要唱咁多次」。
我話知你幾醜,或者內裡爛成點,唔該唔好自己Surrender,呢個世界只有令壽堂會包容你各種缺點。如果女仔覺得你成個人OK,佢唔會覺得你有咩缺點,但你自己先講出黎,佢會標籤你,成功機會因而細好多。
對症下藥,要證明「同你一齊比自己單身好」,得一個重點,就係你要表現到一樣佢好鍾意嘅野,可以喺你身上搵到,而同你一齊可以免費長期享用。最簡單直接,開心。
呢句好似係廢話,但如果你真係明白,你係唔會對MK仔有女嘅原因有任何懷疑。如果同時你又知自己嘅口才同表達能力唔足以Freestyle去面對女性,其實你出門約會前,應該準備定話題,至少兩個。
有咩用?唔係叫你投其所好,如果你,小毒男一號,識投其所好呢啲進階技巧,你唔會覺得追女仔難。兩個話題,係為左令你唔會有「唔知講咩好」嘅尷尬。
唔知講咩好又有咩問題?本身問題唔算好大,但人一慌張,又唔想比人知自己無野講,就會是但搵野講,而是但搵野講呢,因為你係小毒男,叫你兩秒內諗個話題,你九成九係講自己野,或者自己鍾意嘅野。咁你講自己野,一定如數家珍,順過你喺學校做Presentation,你講到勁投入唔識停,諗到自己優點又Keep住要吹噓,對方礙於禮貌唔敢直接派你膠,局聽到完場。
呢度打三粒星,因為小毒男基本都係喺呢一關度比人Foul out,所以要肯定你想投其所好之前,先唔好做啲相反嘅野,whatsapp message同見面同理。至於準備話題,就睇你對人有幾熟悉,唔好出現「人地睇開郭敬明,你就同人傾蘇童」嘅情況,有咩唔識就google唔好懶醒。
記住,自然而得體。
如果你真係諗唔到話題,就傾mutual friend嘅近況,呢個都有一個三粒星嘅要點──唔好講人壞話,壞話呢樣野好蝦人講嘅,如果你係聰明靚仔人群焦點,有時你有技巧地講人壞話會顯示到你嘅品味,但你是一個小毒男,講起壞話上黎就好似個死太監。
但都有例外嘅,如果你發覺對方有意無意不斷講某個人嘅壞話,揚到你都聽得出,你就陪佢講兩句啦,發揮你聆聽同Hea應嘅最高功力,請參考以下標準回應:
「咁佢(女神的敵人)真係好___(負面形容詞)喎,咁你有無___(顯示你有留心聽或show empathy)。
然後有佢繼續講,萬試萬靈。男人追女仔最大嘅問題係唔識聆聽,女人係多愁善感而充滿不安,如果佢信任你,佢會有好多野要同你講,到時你一定要留心聽,唔好打斷人,唔好幫人分析要點做(大忌)。
小毒男嘅失敗,係同時犯上「唔識講野」同「唔識聆聽」,先比人out得咁快。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Tsui Po Man
    Tsui Po Man 於 06/02/2017 評論 NO. 1

    呢個系列可以拍返條片教大家

  • Nicholas Chin
    Nicholas Chin 於 06/02/2017 評論 NO. 2

    靚仔既話此文不適用

  • Andersen Chan
    Andersen Chan 於 07/02/2017 評論 NO. 3

    Stephen Yeung

快捷鍵:←
快捷鍵:→